ஒரு உதட்டில் தேநீர் வாசம்
மறு உதட்டில் உன் வாசம்
- உன் வாசம் வீசும், நம் சமையலறை

பின்னிரவு மழை மேகங்களுக்கு
நடனம் ஆடுகின்றன
நம் முன்னிரவு முத்த மயில்கள்

பின்னிரவுக் கோலங்களுக்கு
புள்ளிகள் வைக்கின்றன,
நம் முன்னிரவு முத்தங்கள்

பின்னிரவுக் காவியங்களுக்கு
முன்னுரை வரைகின்றன
நம் முன்னிரவு முத்தங்கள்

நாளெல்லாம் நிலவுக் கவிதைகள்,
நாள்காட்டியில் இன்று அமாவாசை
- ஆமாம், நானும் ஒரு காதல் கவிஞன்

நேற்றைய அத்தியாயத்தின் கடைசி வரியும்
இன்றைய அத்தியாயத்தின் முதல் வரியுமாய்,
 சிதறிக் கிடக்கின்றன மல்லிகை இதழ்கள்
- இன்னும் நீளட்டும் இந்த இரவு

பகலெல்லாம் நீயும் நானும்
வேறு வேறு வண்ணம்,
இரவெல்லாம் நீயும் நானும் வர்ணஜாலம்
- இன்னும் நீளட்டும் இந்த இரவு