நம் காதல் மொட்டுக்கு, இனிய மலர்ந்த நாள் வாழ்த்துக்கள்

சென்ற வருடம் இதே நாள்:

என் ஒரு தலைக் கவிதைகளுக்கும்

உன் மௌனத்திற்கும்

நடந்து வந்த போர்கள் முடிவுக்கு வந்தன

சென்ற வருடம் இதே நாள்:

உன் இளஞ்சிவப்பு உதட்டு மலர்கள் மீது

என் ஏக்கங்கள்

வீசி வந்த புயல்கள் கரையைக் கடந்தன

சென்ற வருடம் இதே நாள்:

காற்றில் கரையும் உன் பேரழகைத் திருடும்

என் விழிகளின்

கள்ளப் பார்வைகள் சிறையிடப் பட்டன

சென்ற வருடம் இதே நாள்:

காதல் பின்னேயும், திருமணம் முன்னேயுமாய்

உன்னோடு வாழ்ந்த

என் கனவுகள் வண்ணங்களாயின

சென்ற வருடம் இதே நாள்:

என் காதல் ஓவியனால் வடிக்கப்பட்ட

உன் வெட்கச்

சிலைகளுக்கு கண்கள் திறக்கப்பட்டன

சென்ற வருடம் இதே நாள்:

உன் ஒற்றைச் சொல் சம்மதம் பெற

என் காதல்க் கவிஞர்கள் இயற்றிய

சரணங்களுக்கு பல்லவிகள் கிடைத்தன

சென்ற வருடம் இதே நாள்:

என் ஆடி மாத நாட்களில்

உன் காதல் பஞ்சாங்கம் கொண்டு

நம் காதல் தேன்நிலவுக்கு நாட்கள் குறிக்கப்பட்டன

சென்ற வருடம் இதே நாள்:

உன் கரங்களைச் சந்தித்தபின்

குறுக்கும் நெடுக்குமாய்த் திரிந்த

என் கைரேகைகள் வண்ணக் கோலங்களாயின

சென்ற வருடம் இதே நாள்:

காற்றாய் நானும், நானாய்க் காற்றும்

உன்னைத் தீண்டிய போது

உன்னில் ஒளிந்திருந்த நாணங்கள் கண்டுபிடிக்கப்பட்டன

இதே வருடம் இதே நாள்:

இந்த வருடம் இன்னொரு சம்மதம் கொடேனடி,

மலர்ந்த மொட்டுக்கள் திருமண மாலையாகட்டும்

ஏக்கத்தோடு நானும், மஞ்சள் நூலோடு என் விரல்களும்