என் காதல் மேகங்களை
எப்படியடா கண்டுகொள்கின்றன
உன் தோகை நடனங்கள்?

ஏன் இன்னும் நீ அலுவலகத்திலிருந்து திரும்பவில்லை?
சமையலறை மேசை மீது கொட்டி வைத்திருக்கிறேன்
என் அழுகை விநாடிகளை..

ஐப்பசி மாத நிச்சயத்திருக்கும்
வைகாசி மாதப் பந்தலுக்கும்
நடுவே பரிதாபமாய் சிக்கிக்கொண்டன
என் ஏக்கத் தனிமை நிமிடங்கள்

எப்போது அலுவலகத்திலிருந்து திரும்புவாய்?
காலையில் கொடுத்துப் போன முத்தம்
காய்ந்து போய்க்கொண்டிருக்கிறது

நீ அலுவலகம் சென்றபின்
உன் சட்டைகளில் பூத்திருக்கும்
உன் வாசங்களைக் காதலிக்க ஆரம்பிக்கிறேன்

அடிக்கடி சமையலறைக்குள் வருகிறாயே,
சமையல் வாசம் பிடிக்கவா?
என் வாசம் பிடிக்கவா?

என் தேசத்தில் கவிதைப் பஞ்சம் வந்துவிட்டது,
உன் குரலை நாளைக்கு
எப்படியாவது கேட்டாக வேண்டும்