தனித் தனியாய் இருந்த நாம் கூட
ஒன்றாய் இணைந்து போனோம்,
ஏன் இன்னும் புகைவண்டித் தண்டவாளங்கள்
பிரிந்தே இருக்கின்றன?

நம் பேரை எழுதிப் பார்த்தால்தான்
நான் வடிவமைக்கும்
திருமண அழைப்பிதழ்கள்
முழுப்பொலிவு பெறுகின்றன

முதல் முத்தம் -
எப்போதுமே நினைவில் இருக்குமாம்,
நம்முடைய எந்த முதல் முத்தம்
உனக்கு இன்னும் நினைவில் இருக்கிறது?

திருக்குறள் ஒப்புவித்தல் போட்டியில்
முதற்பரிசு வாங்கிய எனக்கு,
உனக்காக எழுதும் மடலுக்கு
ஏனோ வார்த்தைகள் தட்டுப்பாடு

தங்கத்தை உருக்கி
மாங்கல்யங்கள் செய்யும் நான்,
நம் மாங்கல்யத்திர்க்காக
உன்னிடம் இன்னமும்
உருகிக்கொண்டுதான் இருக்கின்றேன்

முன்பெல்லாம் நீ பேசும் வார்த்தைகள்
பாடலாய் என் செவிகளில் இசைந்து போகும்,
இப்போதெல்லாம் உன் வார்த்தைகள்
மணமேடை மந்திரங்களாய்த்தான் ஒலிக்கின்றன

எனக்குப் பெரிதாய் பரிச்சயமில்லாத உன்னை
என் உடம்பின் ஒவ்வொரு செல்லுக்கும்
பரிச்சயமாக்கி இருக்கிறது இந்தக் காதல்