திருக்குறள் ஒப்புவித்தல் போட்டியில்
முதற்பரிசு வாங்கிய எனக்கு,
உனக்காக எழுதும் மடலுக்கு
ஏனோ வார்த்தைகள் தட்டுப்பாடு

தங்கத்தை உருக்கி
மாங்கல்யங்கள் செய்யும் நான்,
நம் மாங்கல்யத்திர்க்காக
உன்னிடம் இன்னமும்
உருகிக்கொண்டுதான் இருக்கின்றேன்

முன்பெல்லாம் நீ பேசும் வார்த்தைகள்
பாடலாய் என் செவிகளில் இசைந்து போகும்,
இப்போதெல்லாம் உன் வார்த்தைகள்
மணமேடை மந்திரங்களாய்த்தான் ஒலிக்கின்றன

எனக்குப் பெரிதாய் பரிச்சயமில்லாத உன்னை
என் உடம்பின் ஒவ்வொரு செல்லுக்கும்
பரிச்சயமாக்கி இருக்கிறது இந்தக் காதல்

என் வீட்டுக் குங்குமச்சிமிழுக்கும்
என் விரல்களுக்கும்
சாப விமோச்சனம் தர
எப்போது வரப்போகிறாய்?

நானில்லா இரவுகளில்
உன் தலையணையில்,
என் பெயரை வரைந்து போகின்றன
உன் அழகிய உதடுகள்

நீ மட்டும்தான் உறங்கிப்போயிருக்கிறாய்,
எப்போதும் போல
உன் அழகுக்கும்
எனக்கும்
விடியா இரவுதான்